Covid 19 കൊറോണ കനത്ത ജാഗ്രത

കൊറോണ കനത്ത ജാഗ്രത

ആളുകൾക്കിടയിൽ പരിഭ്രാന്തി പടരുന്നതിനുള്ള ഒരു പ്രധാന കാരണം, കൊറോണ വൈറസിന്റെ ലക്ഷണങ്ങൾ നമുക്ക് ഇടയ്ക്കിടെ ഉണ്ടാകാറുള്ള സാധാരണ ഇൻഫ്ലുവൻസയുമായി സാമ്യമുള്ളതാണ് എന്നത് തന്നെയാണ്. അതുകൊണ്ടു തന്നെ ഇത് രണ്ടും തമ്മിലുള്ള വ്യത്യാസങ്ങൾ തിരിച്ചറിയുന്നത് വളരെയധികം ബുദ്ധിമുട്ടായി മാറുന്നു. ഓരോ ദിവസം കഴിയുന്തോറും നമുക്കിടയിൽ ഭീതി വർദ്ധിപ്പിച്ചു കൊണ്ടിരിക്കുകയാണ് കൊറോണ വൈറസ്. ചികിത്സയോ പ്രതിരോധ വാക്സിനുകളോ ഇതുവരെ കണ്ടെത്തിയിട്ടില്ലാത്തതിനാൽ ലോകം മുഴുവനും ഇന്ന് ഏറ്റവും ഭയത്തോടെ നോക്കി കാണുന്ന ഒന്നായി മാറിയിരിക്കുന്നു ഈ രോഗം. ചൈനയുടെ വുഹാനിൽ ഡിസംബർ 31നാണ് ആദ്യമായി നോവൽ കൊറോണ വൈറസ് (കൊവിഡ് - 19) പൊട്ടിപ്പുറപ്പെട്ടത്. ചൈനയിൽ മാത്രമല്ല, അമേരിക്ക ഉൾപ്പടെ വിവിധ രാജ്യങ്ങളിൽ ഇതുമായി ബന്ധപ്പെട്ട് മരണസംഖ്യ ഉയരുകയാണ്. മാത്രമല്ല ഇതിനോടകം ഇതുവരെ രോഗം സ്ഥിരീകരിച്ചവരുടെ എണ്ണം ഞെട്ടിക്കുന്നതാണ്. എഴുപത്തിഞ്ചിലധികം രാജ്യങ്ങളിൽ ഈ രോഗം പടർന്നു കഴിഞ്ഞു.

ദുർഘടമായ ഈ സാഹചര്യത്തിൽ നിരവധി മെഡിക്കൽ വിദഗ്ധർ മുന്നോട്ട് വന്ന് കൊറോണ വൈറസിനെക്കുറിച്ചുള്ള വസ്തുതകളും ഇത് പ്രതിരോധിക്കാനായി എന്തെല്ലാം കാര്യങ്ങൾ ചെയ്യാമെന്നതിനെപ്പറ്റിയും ശുപാർശ ചെയ്യുന്നു. ഇതെപ്പറ്റി കൂടുതൽ അറിയാം.

എന്താണ് കൊറോണ വൈറസ്?

സസ്തനികളെയും പക്ഷികളെയും ബാധിക്കുന്ന പകർച്ചവ്യാധികളുടെ കൂട്ടത്തിൽ നിന്നാണ് കൊറോണ വൈറസിനെറെയും കടന്നു വരവ്. പല സാഹചര്യങ്ങളിൽ നിന്നും ഇത് മനുഷ്യരെയും പിടികൂടുന്നു. ഈ ഗ്രൂപ്പിൽ പെട്ട മറ്റ് വൈറസുകളൊന്നും വലിയ രീതിയിൽ അപകടകാരികൾ അല്ല. മനുഷ്യരിൽ, അവ ശ്വസനവ്യവസ്ഥയെ ബാധിക്കുകയും ഇൻഫ്ലുവൻസ, സിവിയർ അക്യൂട്ട് റെസ്പിറേറ്ററി സിൻഡ്രോം (SARS), മിഡിൽ-ഈസ്റ്റ് റെസ്പിറേറ്ററി സിൻഡ്രോം (MERS) തുടങ്ങിയ രോഗങ്ങൾക്ക് കാരണമാവുകയും ചെയ്യുന്നു. 2002 നവംബറിനും 2003 ജൂലൈയ്ക്കും ഇടയിൽ, തെക്കൻ ചൈനയിലാണ് SARS രോഗം ആദ്യമായി പൊട്ടിപ്പുറപ്പെട്ടത്. ബാധിക്കപ്പെട്ട 8,098 ആളുകളിൽ 774 പേരേയും ഈ രോഗം കൊന്നൊടുക്കി. MERS രോഗം ക്യാമൽ ഫ്ലൂ എന്ന പേരിലും അറിയപ്പെടുന്നു. 2012 ൽ ഈ രോഗം ആദ്യമായി സൗദി അറേബ്യയിൽ റിപ്പോർട്ട് ചെയ്തതിനു ശേഷം 858 പേരുടെ മരണത്തിന് ഇത് കാരണമായിട്ടുണ്ട്. പനി, ചുമ, വയറിളക്കം, ശ്വാസം മുട്ടൽ എന്നിവയാണ് ഇതിൻ്റെ പ്രധാന രോഗലക്ഷണങ്ങൾ. മറ്റ് ആരോഗ്യപ്രശ്നങ്ങളുള്ളവരിൽ രോഗം കൂടുതൽ കഠിനമായിരിക്കും. രോഗനിർണയം നടത്തിയ കേസുകളിൽ മൂന്നിലൊന്നാണ് മരണനിരക്ക് എന്നതും ഭീതിയുളവാക്കുന്ന മറ്റൊരു കാര്യം.

കൊറോണ വൈറസ് ഇന്ന് മെഡിക്കൽ സയൻസിന് പൂർണ്ണമായും അജ്ഞാതമായ ഒന്നാണ്. വാസ്തവത്തിൽ, ഒരാൾക്ക് സങ്കൽപ്പിക്കാവുന്നതിലും അപ്പുറമാണിത്. കൊറോണ വൈറസിനെ പ്രതിരോധിക്കുന്നതിനുള്ള വാക്സിനുകൾ ഇതുവരെ കണ്ടെത്തിയിട്ടില്ല. അതുകൊണ്ടുതന്നെ രോഗ ലക്ഷണങ്ങളുടെ അടിസ്ഥാനത്തിൽ മാത്രമുള്ള ചികിത്സയാണ് ഇപ്പോൾ നൽകി വരുന്നത്.

മനുഷ്യരെ ബാധിക്കുന്ന കൊറോണ വൈറസുകളിൽ NL63, 229E, HKU1, OC43 എന്നിവ ഉൾപ്പെടുന്നു. ഇത് സാധാരണയായി ശ്വാസനാളിനെയാണ് ആദ്യം ബാധിക്കുക. ആദ്യ ലക്ഷണമായി സാധാരണ ജലദോഷം മാത്രമായിരിക്കും പ്രകടമാവുക. പിന്നീട് ഇത് ന്യൂമോണിയിലേക്കും കൂടുതൽ ദോഷകരമായ ആരോഗ്യ പ്രശ്നങ്ങളിലേക്കും നയിക്കുന്നു.

പ്രതിരോധശേഷി കുറവുള്ളവരെ ഇത് വളരെ പെട്ടെന്ന് ബാധിക്കാൻ സാധ്യതയുണ്ട്. അതിനാൽ, പ്രായമായ ആളുകൾ, ഗർഭിണികൾ, കുട്ടികൾ, ഹൃദ്രോഗം, കാൻസർ തുടങ്ങിയ ആരോഗ്യ പ്രശ്നങ്ങൾ ഉള്ളവരെ കൊറോണ വൈറസ് വേഗത്തിൽ പിടികൂടാനുള്ള സാധ്യതയുണ്ട്. അതുകൊണ്ടുതന്നെ മുൻകരുതലും ശുശ്രൂഷയും കൂടുതൽ ആവശ്യമുള്ളത് ഇവർക്ക് തന്നെയാണ്.

കൊറോണ വൈറസിന്റെ ലക്ഷണങ്ങൾ

നേരത്തെ സൂചിപ്പിച്ചതുപോലെ, കൊറോണ വൈറസ് സാധാരണ ഇൻഫ്ലുവൻസയ്ക്ക് സമാനമായ രീതിയിൽ നിരവധി ലക്ഷണങ്ങളെ പ്രകടിപ്പിക്കാം. നേരത്തെ തന്നെ ആവശ്യമായ നടപടികൾ കൈക്കൊള്ളാനായി നിങ്ങൾ അറിയേണ്ട ഇതിൻ്റെ അടയാളങ്ങളും ലക്ഷണങ്ങളും ഇനി പറയുന്ന കാര്യങ്ങളാണ്.

☛ ജലദോഷവും കഠിനമായ മൂക്കൊലിപ്പും

☛ പനി

☛ ചുമ

☛ തലവേദന

☛ തൊണ്ടവേദന

☛ ശാരീരിക അസ്വസ്ഥത

☛ ശ്വസന പ്രശ്നങ്ങൾ

☛ ശ്വാസകോശത്തിലെ വീക്കം / ന്യുമോണിയ

കൊറോണ വൈറസിന്റെ ലക്ഷണങ്ങളെ സാധാരണ ഇൻഫ്ലുവൻസയുമായി വേർതിരിച്ചറിയാൻ ഒരു സാധാരണക്കാരന് കഴിയാത്തത് കാരണം, ഈ രോഗം ആദ്യഘട്ടത്തിലേ തിരിച്ചറിയുന്നത് വളരെ ബുദ്ധിമുട്ടായി മാറുന്നു. കൊറോണ വൈറസിന് 14 ദിവസം വരെ ഇൻക്യുബേഷൻ പിരീഡ് ഉണ്ട്. അതിനാൽ 7 മുതൽ 10 ദിവസങ്ങൾക്കപ്പുറം രോഗലക്ഷണങ്ങൾ തുടരുകയോ വഷളാവുകയോ ചെയ്താൽ വൈദ്യസഹായം തേടേണ്ടത് അത്യാവശ്യമായി മാറുന്നു.

ഇതെല്ലാം കേൾക്കുമ്പോൾ തന്നെ നിങ്ങളിൽ ആശങ്കകൾ ഉടലെടുക്കുമെന്ന് ഞങ്ങൾക്ക് ഉറപ്പുണ്ട്, എന്നാൽ നിങ്ങളെയും കുടുംബത്തെയും സുരക്ഷിതമായി സംരക്ഷിക്കുന്നതിനായി ഇന്നു മുതൽ നമുക്ക് ചില പ്രതിരോധ നടപടികൾ സ്വീകരിക്കേണ്ടതുണ്ട്.

കൊറോണവൈറസണിനെ പ്രതിരോധിക്കാൻ എന്തെല്ലാം ചെയ്യാം?

കുറഞ്ഞ പ്രതിരോധശേഷി ഈ വൈറസ് ബാധിക്കുന്നതിനുള്ള ഏറ്റവും വലിയ കാരണമായതിനാൽ, പ്രതിരോധശേഷി വർദ്ധിപ്പിക്കുന്നത് തന്നെയാണ് ഇതിനെ തടയാനുള്ള വ്യക്തമായ മാർഗ്ഗം. ഇതിനായി നിങ്ങൾക്ക് ചെയ്യാവുന്ന ചില നടപടികൾ ഇതാ:

☛ എല്ലായിപ്പോഴും ശരീരത്തിൽ ജലാംശം നിലനിർത്തുക. ഒരിക്കലും നിർജലീകരണം സംഭവിക്കരുത്. കുടിക്കുന്ന വെള്ളം തിളപ്പിച്ചാറ്റി ഉപയോഗിക്കാം.

☛ ധാരാളം വിശ്രമം നേടുക.

☛ ജലദോഷം, ചുമ, തൊണ്ടവേദന, പനി എന്നിവയുടെ ലക്ഷണങ്ങൾ കണ്ടു തുടങ്ങുമ്പോൾ തന്നെ ഇതിനാവശ്യമായ മരുന്ന് കഴിക്കുക.

☛ ശക്തമായ രോഗപ്രതിരോധ ശേഷി വളർത്തുന്നതിനായി ആരോഗ്യകരവും പോഷകസമൃദ്ധവുമായ ഭക്ഷണങ്ങൾ കഴിക്കുക.

☛ വ്യക്തി ശുചിത്വം നിർബന്ധമായും ശീലമാക്കാം.

☛ സോപ്പും വെള്ളവും ഉപയോഗിച്ച് പതിവായി കൈ കഴുകുക.

☛ മദ്യം അടിസ്ഥാനമാക്കിയുള്ള സാനിറ്റൈസർ ഉപയോഗിക്കുക.

☛ നിങ്ങളുടെ ചുറ്റുപാടുകൾ വൃത്തിയായി സൂക്ഷിക്കുക.

☛ തുമ്മലും ചുമയും ഉണ്ടാകുമ്പോൾ മൂക്കും വായയും പൊത്തി വയ്ക്കാൻ ശ്രദ്ധിക്കണം.

☛ ഒരിക്കൽ ഉപയോഗിച്ച ടിഷ്യു ഉപേക്ഷിക്കുക.

☛ നിങ്ങളുടെ കണ്ണിലും മൂക്കിലും സ്പർശിക്കുന്നത് ഒഴിവാക്കുക.

☛ പതിവായി ഉപയോഗിക്കുന്ന വസ്തുവകകൾ കൃത്യമായി അണുവിമുക്തമാക്കുക.

☛ തിരക്കേറിയ സ്ഥലങ്ങളിലേക്കുള്ള യാത്ര ഒഴിവാക്കുക

☛ ജലദോഷവും ചുമയും ഉള്ള ഒരാളുമായുള്ള അടുത്ത സമ്പർക്കം ഒഴിവാക്കുക.

☛ വളർത്തു മൃഗങ്ങളുമായുള്ള സമ്പർക്കവും കുറച്ചുനാളത്തേക്ക് ഒഴിവാക്കുക.

☛ അസംസ്കൃതമായ മാംസവും പാലും ശരിയായി പാകം ചെയ്യാതെ കഴിക്കുന്ന ശീലം ഒഴിവാക്കുക.

☛ അസംസ്കൃത മാംസം കൈകാര്യം ചെയ്യുമ്പോൾ, കയ്യുറകൾ ധരിക്കുകയും മലിനീകരണം ഒഴിവാക്കാൻ പ്രത്യേകം ശ്രദ്ധിക്കുകയും ചെയ്യുക.

കൊറോണ വൈറസ് പടരുന്നത് ഒഴിവാക്കാൻ

രോഗം പടരുന്നത് ഒഴിവാക്കനായി പിന്തുടരേണ്ട ചില പൊതു മാർഗ്ഗനിർദ്ദേശങ്ങളെക്കുറിച്ചും നിങ്ങൾ അറിഞ്ഞിരിക്കണം. കൊറോണ വൈറസിൽ നിന്ന് സ്വയം സുരക്ഷിതമായിരിക്കാനുള്ള പൊതു മാർഗ്ഗനിർദ്ദേശങ്ങൾ ഇതെല്ലാമാണ്:

☛ കൊറോണ വൈറസിൻ്റെ സാന്നിധ്യം ഗണ്യമായ അളവിൽ റിപ്പോർട്ട് ചെയ്യപ്പെട്ടിട്ടുള്ള ഒരു രാജ്യത്തേക്ക് വിദേശയാത്ര നടത്തുകയാണെങ്കിൽ, നിങ്ങളുടെ പ്രതിരോധശേഷി കൂടുതൽ വർദ്ധിപ്പിക്കുകയും പനി, ചുമ, ജലദോഷം എന്നിവയ്ക്ക് ആവശ്യമായ എല്ലാ മരുന്നുകളും കയ്യിൽ കരുതുകയും ചെയ്യുക.

☛ കൊറോണ വൈറസ് ബാധിച്ച ആളുകൾ മറ്റൊരു രാജ്യത്തേക്ക് യാത്ര ചെയ്യാതിരിക്കാനായി ലോകമെമ്പാടുമുള്ള നിരവധി അന്താരാഷ്ട്ര വിമാനത്താവളങ്ങളും റെയിൽവേ സ്റ്റേഷനുകളും ബസ് സ്റ്റേഷനുകളുമെല്ലാം ആരോഗ്യ പരിശോധനകൾ നടത്താൻ ആരംഭിച്ചിരിക്കുന്നു. നിങ്ങൾക്ക് ഇതിനകം പനിയും ചുമയും ജലദോഷവും ഉണ്ടെങ്കിൽ യാത്രാ പദ്ധതികൾ റദ്ദാക്കുക.

☛ കൊറോണ വൈറസ് ബാധിച്ച രോഗികളുമായി അടുത്ത ബന്ധം പുലർത്തിയിട്ടുണ്ട് എന്ന സംശയം ഉള്ളവർ ഉടൻ തന്നെ സ്വയം പരിശോധനയ്ക്ക് വിധേയമാകണം.

☛ ജലദോഷം, പനി, ചുമ എന്നിവയ്‌ക്കൊപ്പം ശ്വാസതടസ്സത്തിൻ്റെ പ്രശ്‌നങ്ങൾ അനുഭവപ്പെട്ടാൽ ഉടൻ തന്നെ വൈദ്യസഹായം തേടുക.

☛ പുറത്തുനിന്ന് ഭക്ഷണം കഴിക്കുന്നത് കഴിവതും ഒഴിവാക്കുക. ഇനി അഥവാ കഴിക്കേണ്ട സാഹചര്യം ഉണ്ടാവുകയാണെങ്കിൽ, ഭക്ഷ്യസുരക്ഷ, ഭക്ഷണം കൈകാര്യം ചെയ്യൽ, ശുചിത്വം എന്നിവയടങ്ങുന്ന പൊതു മാർഗ്ഗനിർദ്ദേശങ്ങൾ എല്ലാം തന്നെ റെസ്റ്റോറന്റുകൾ കൃത്യമായി പാലിക്കുന്നുണ്ടെന്ന് ഉറപ്പാക്കുക.

ശൈത്യകാലത്തും വസന്തകാലത്തും കൊറോണ വൈറസ് സജീവമായി പടർന്നു പിടിക്കാനുള്ള സാധ്യതയുണ്ടെന്നാണ് വിദഗ്ദ്ധർ റിപ്പോർട്ടു ചെയ്യുന്നത്. അതിനാൽ എല്ലായിപ്പോഴും ജാഗ്രതയോടെ യാത്ര ചെയ്യുക. വൈറസ് ബാധിക്കുന്നത് തടയാനായി തിരക്കേറിയ സ്ഥലങ്ങൾ ഒഴിവാക്കാനും നിങ്ങൾ ശ്രമിക്കണം. കൊറോണ വൈറസുകളെക്കുറിച്ച് നിങ്ങൾക്ക് കൂടുതൽ വിവരങ്ങൾ ആവശ്യമുണ്ടെങ്കിലോ അല്ലെങ്കിൽ നിങ്ങൾക്ക് അസുഖം പിടിപെട്ടതായി ഭയപ്പെടുന്നുണ്ടെങ്കിൽ, ഉടൻ തന്നെ ഒരു മെഡിക്കൽ പ്രാക്ടീഷണറെ സന്ദർശിക്കുക. അദ്ദേഹം നിങ്ങൾക്ക് കൂടുതൽ നിർദ്ദേശങ്ങളും ആവശ്യമായ പരിശോധനകളും നൽകാൻ സഹായിക്കും.