തൊഴില്‍ വാര്‍ത്തകള്‍

ഹൈസ്‌കൂള്‍ അസിസ്റ്റന്റ് ഒഴിവുകള്‍

ഹൈസ്‌കൂള്‍ അസിസ്റ്റന്റ്(അറബിക്) 1 എന്‍ സി എ( ഈഴവ/ബില്ലവ/തീയ്യ) (കാറ്റഗറി നമ്പര്‍. 556/2019) തസ്തികയിലേക്കുള്ള ഇന്റര്‍വ്യു തിരുവനന്തപുരം പട്ടത്തുള്ള പി എസ് സി ആസ്ഥാന ഓഫീസില്‍ ഡിസംബര്‍ രണ്ടിന് നടക്കും. പ്രൊഫൈലില്‍ അറിയിപ്പ് ലഭിച്ചിട്ടില്ലാത്ത ഉദ്യോഗാര്‍ഥികള്‍ കൊല്ലം ജില്ലാ പി എസ് സി ഓഫീസുമായി ബന്ധപ്പെടണം.

ഫാര്‍മസിസ്റ്റ് ഒഴിവുകള്‍

 പാലക്കാട് ജില്ലാ മെഡിക്കല്‍ ഓഫീസിന്റെ (ഹോമിയോ) കീഴിലുള്ള സ്ഥാപനങ്ങളില്‍ ഫാര്‍മസിസ്റ്റ് തസ്തികയില്‍ ദിവസവേതനാടിസ്ഥാനത്തില്‍ നിയമനം നടത്തുന്നു. എന്‍.സി.പി / സി.സി.പി (ഹോമിയോ) കോഴ്‌സ് പാസ്സായ ഉദ്യോഗാര്‍ത്ഥികള്‍ കോവിഡ് മാനദണ്ഡങ്ങള്‍ പാലിച്ച് യോഗ്യത, തിരിച്ചറിയില്‍ / ആധാര്‍ കാര്‍ഡ് എന്നിവയുടെ അസല്‍, പകര്‍പ്പുകള്‍ എന്നിവ സഹിതം പാലക്കാട് കല്‍പ്പാത്തി ചാത്തപുരത്തുള്ള ഹോമിയോ ജില്ലാ മെഡിക്കല്‍ ഓഫീസില്‍ നവംബര്‍ 24 ന് രാവിലെ 11 ന് ഹാജരാകണം. പ്രായപരിധി 45 വയസ്. ഓണ്‍ലൈന്‍ വഴി പങ്കെടുക്കാന്‍ ആഗ്രഹിക്കുന്നവര്‍ സര്‍ട്ടിഫിക്കറ്റുകളുടെ പകര്‍പ്പ് ഇ-മെയില്‍ ഐ.ഡി, വാട്‌സ് ആപ്പ് നമ്പര്‍ എന്നിവ സഹിതം 24 ന് വൈകിട്ട് അഞ്ചിനകം dmohomoeopkd@kerala.gov.in ല്‍ അപേക്ഷ സമര്‍പ്പിക്കണം. ഫോണ്‍: 0491 2966355, 2576355

അങ്കണവാടി ഹെല്‍പ്പര്‍ /വര്‍ക്കര്‍ തസ്തികളിലേക്ക് അപേക്ഷ ക്ഷണിച്ചു

വനിതാ ശിശു വികസന വകുപ്പിന് കീഴില്‍ ജില്ലയിലെ ചാലക്കുടി അഡീഷണല്‍ പ്രൊജക്റ്റ് പരിധിയിലുള്ള ആതിരപ്പള്ളി, കോടശ്ശേരി, പരിയാരം, മേലൂര്‍, പഞ്ചായത്തുകളിലെ അങ്കണവാടി വര്‍ക്കര്‍ /ഹെല്‍പ്പര്‍ തസ്തികകളിലെ ഒഴിവുകളിലേക്ക് ഈ പഞ്ചായത്തുകളില്‍ സ്ഥിരതാമസമള്ള വനിതകളില്‍ നിന്നും അപേക്ഷ ക്ഷണിച്ചു. അപേക്ഷകര്‍ 2020 ജനുവരി ഒന്നിന് 18 വയസ്സ് പൂര്‍ത്തിയാക്കിയവരും 46 വയസ്സ് കഴിയാത്തവരുമായിരിക്കണം. എസ് സി /എസ് ടി വിഭാഗത്തിലുള്ളവര്‍ക്ക് മൂന്നുവര്‍ഷത്തെ വയസ്സ് ഇളവ് അനുവദിക്കുന്നതാണ്. അങ്കണവാടി വര്‍ക്കര്‍ തസ്തികയിലേക്ക് അപേക്ഷിക്കുന്നവര്‍ എസ്എസ്എല്‍സി പാസായിരിക്കണം. 

അങ്കണവാടി ഹെല്‍പ്പര്‍ തസ്തികയിലേക്ക് അപേക്ഷിക്കുന്നവര്‍ എഴുത്തും വായനയും അറിഞ്ഞിരിക്കണം. നിശ്ചിത മാതൃകയിലുള്ള അപേക്ഷയോടൊപ്പം ജനനതീയതി, വയസ്സ്, ജാതി, വിദ്യാഭ്യാസ യോഗ്യത, സ്ഥിരതാമസം, മുന്‍ പരിചയം എന്നിവ തെളിയിക്കുന്നതിനുള്ള സാക്ഷ്യപത്രങ്ങളുടെ ശരി പകര്‍പ്പുകള്‍ സമര്‍പ്പിക്കണം. കവറിന് പുറത്ത് മുകള്‍ഭാഗത്ത് വര്‍ക്കര്‍ /ഹെല്‍പ്പര്‍ സെലക്ഷന്‍ 2020 എന്ന് എഴുതേണ്ടതാണ്. നിശ്ചിത മാതൃകയില്‍ ഇല്ലാത്തതോ, അപൂര്‍ണ്ണമോ, തെറ്റായ വിവരങ്ങള്‍ രേഖപ്പെടുത്തിയതോ, ആവശ്യമായ രേഖകള്‍ സമര്‍പ്പിക്കാത്തതോ, ഒട്ടിക്കാത്തതോ ആയ അപേക്ഷകള്‍ പരിഗണിക്കുന്നതല്ല. അപേക്ഷകളുടെ പരിശോധനകള്‍ക്ക് ശേഷം അര്‍ഹരായവരെ കൂടിക്കാഴ്ചയ്ക്ക് ക്ഷണിക്കും. കൂടിക്കാഴ്ചയുടെ അടിസ്ഥാനത്തിലാണ് റാങ്ക് ലിസ്റ്റ് തയ്യാറാക്കുക. പിഎസ്സിയില്‍ ക്ലാസ് ഫോര്‍ ജീവനക്കാരുടെ സംവരണ വ്യവസ്ഥയുടെ അടിസ്ഥാനത്തില്‍ ഒഴിവ് വരുന്ന മുറയ്ക്ക് വനിതാ ശിശു വികസന വകുപ്പില്‍ നിന്നുള്ള ഉത്തരവുകള്‍ക്ക് വിധേയമായായിരിക്കും നിയമനം.

അപേക്ഷാഫോമിന്റെ മാതൃക ചാലക്കുടി അഡീഷണല്‍ ഐ സി ഡി എസ് പ്രോജക്ട് അതിരപ്പിള്ളി, കോടശ്ശേരി, പരിയാരം, മേലൂര്‍ പഞ്ചായത്ത് ഓഫീസുകള്‍ എന്നിവിടങ്ങളില്‍ നിന്നും ലഭിക്കുന്നതാണ്. ഇതുസംബന്ധിച്ച കൂടുതല്‍ വിവരങ്ങള്‍ക്ക് ചാലക്കുടി ഐ സി ഡി എസ് പ്രോജക്ട് ഓഫീസുമായി ബന്ധപ്പെടുക. പൂരിപ്പിച്ച അപേക്ഷകള്‍ 2020 സെപ്റ്റംബര്‍ 14ന് വൈകുന്നേരം 5 മണിവരെ നേരിട്ടോ തപാല്‍ വഴിയോ സ്വീകരിക്കും. മറ്റ് സ്ഥലങ്ങളില്‍ നിന്നും അപേക്ഷകള്‍ സ്വീകരിക്കുന്നതല്ല. നിശ്ചിത സമയ പരിധിക്ക് ശേഷം ലഭിക്കുന്ന അപേക്ഷകള്‍ പരിഗണിക്കുന്നതല്ല. നിലവിലുള്ള റാങ്ക് ലിസ്റ്റില്‍ ഉള്‍പ്പെട്ടവര്‍ വീണ്ടും അപേക്ഷിക്കേണ്ടതില്ല. മുന്‍വര്‍ഷങ്ങളില്‍ അപേക്ഷിച്ചവര്‍ വീണ്ടും അപേക്ഷിക്കേണ്ടതാണ്. അപേക്ഷകള്‍ അയയ്‌ക്കേണ്ട വിലാസം ശിശുവികസന പദ്ധതി ഓഫീസര്‍, ഐ സി ഡി എസ് പ്രോജക്ട്, ചാലക്കുടി അഡീഷണല്‍, മിനി സിവില്‍ സ്റ്റേഷന്‍, ചാലക്കുടി 680307.

തൃപ്പൂണിത്തുറ സർക്കാർ സംസ്‌കൃത കോളേജിൽ ഗസ്റ്റ് അധ്യാപകരാകാം

 സംസ്‌കൃതം ജ്യോതിഷം വിഭാഗത്തിൽ അതിഥി അധ്യാപകരെ നിയമിക്കുന്നതിന് കൂടിക്കാഴ്ച നടത്തും.

ഉദ്യോഗാർഥികൾ 55 ശതമാനം മാർക്കോടെ ബന്ധപ്പെട്ട വിഷയങ്ങളിൽ ബിരുദാനന്തര ബിരുദം നേടിയവരും യു.ജി.സി യോഗ്യതയുള്ളവരും അതത് മേഖല കോളേജ് വിദ്യാഭ്യാസ ഉപമേധാവിയുടെ അതിഥി അധ്യാപക ലിസ്റ്റിൽ ഉൾപ്പെട്ടവരോ കോളേജിയേറ്റ് ഡയറക്ടറുടെ നിർദ്ദേശാനുസരണം ഓൺലൈൻ രജിസ്‌ട്രേഷൻ നടത്തിയവരോ ആയിരിക്കണം.  യു.ജി.സി യോഗ്യതയുള്ളവരുടെ അഭാവത്തിൽ മറ്റുള്ളവരെയും പരിഗണിക്കും.  താല്പര്യമുള്ളവർ ആഗസ്റ്റ് 

19ന് രാവിലെ 11ന് അസ്സൽ സർട്ടിഫിക്കറ്റുകൾ സഹിതം പ്രിൻസിപ്പലിന്റെ ഓഫീസിൽ എത്തണം.

അമൃത് മിഷനിൽ കരാർ നിയമനം നടത്തുന്നു

അമൃത് മിഷനിൽ (അടൽ മിഷൻ ഫോർ റെജുവെനേഷൻ ആന്റ് അർബൻ ട്രാൻസ്ഫർമേഷൻ) സിറ്റി മിഷൻ മാനേജ്മെൻറ് യൂണിറ്റിൽ അർബൻ ഇൻഫ്രാസ്ട്രക്ചർ എക്സ്പർട്ട് ഒഴിവിലേക്ക് കരാർ നിയമനത്തിന് അപേക്ഷ ക്ഷണിച്ചു.

അംഗീകൃത യൂണിവേഴ്‌സിറ്റിയിൽ നിന്നും എഞ്ചിനിയറിംഗ് ബിരുദമാണ് യോഗ്യത.

മുനിസിപ്പൽ അടിസ്ഥാന വികസന പദ്ധതികളുടെ ഡിസൈനിംഗിലും നടത്തിപ്പിലും അംഗീകൃത ഏജൻസിക്ക് കീഴിൽ മൂന്നുമുതൽ അഞ്ചു വർഷം പ്രവൃത്തി പരിചയവും പാരിസ്ഥിതിക നിയമവശങ്ങളെക്കുറിച്ചുള്ള അറിവും കമ്പ്യൂട്ടർ പരിജ്ഞാനവും ഉണ്ടായിരിക്കണം. പ്രായപരിധി 58 വയസ്. ശമ്പളം 55,000/ രൂപ. യോഗ്യതാവിശദാംശങ്ങളും അപേക്ഷാഫോറവും www.amrutkerala.org എന്ന വെബ്‌സൈറ്റിൽ ലഭിക്കും. 

അപേക്ഷയുടെ കോപ്പിയും വിശദമായ ബയോഡാറ്റയും aoklsmmu@gmail.com എന്ന ഇമെയിൽ ഐഡിയിലും സ്റ്റേറ്റ് മിഷൻ മാനേജ്‌മെന്റെ് യൂണിറ്റ് (അമൃത് ), T.C 25/801(11),  ഫോർത്ത് ഫ്‌ളോർ, മീനാക്ഷി പ്ലാസ, ആർടെക് ബിൽഡിംഗ്, ഗവൺമെന്റെ് ഹോസ്പിറ്റൽ വുമൺ ആന്റ് ചിൽഡ്രൻ തൈക്കാട് (പിഒ) തിരുവനന്തപുരം-695014 അയയ്ക്കണം. അപേക്ഷയുടെ പുറത്ത് ‘Application for the post Urban Infrastructure Expert ‘എന്ന് എഴുതിയിരിക്കണം, 

അവസാന തിയതി: ആഗസ്റ്റ് 20.

സംസ്ഥാന സിവില്‍ സര്‍വീസ് അക്കാദമിയില്‍ ഒഴിവുകള്‍ 

സംസ്ഥാന സിവിൽ സർവീസ് അക്കാഡമിയിലും ഉപകേന്ദ്രങ്ങളിലും വിവിധ തസ്തികകളിൽ താത്ക്കാലിക നിയമനം നടത്തുന്നു. അഡ്മിനിസ്‌ട്രേറ്റീവ് അനലിസ്റ്റ് (ഒരു ഒഴിവ്, യോഗ്യത: ബി.ടെക്/ എം.ടെക്, എം.ബി.എയും യു.പി.എസ്.സിയുടെ സിവിൽ സർവീസ് പരീക്ഷയുടെ ഇന്റർവ്യൂവിൽ പങ്കെടുത്തവർക്ക് പരിഗണന, ശമ്പളം: പ്രതിമാസം 45000 രൂപ).

അക്കാഡമിക്ക് സപ്പോർട്ട് കോ-ഓർഡിനേറ്റർ (ഒരു ഒഴിവ്, യോഗ്യത: ബിരുദവും യു.പി.എസ്.സി സിവിൽ സർവീസ് ഇന്റർവ്യൂവിൽ ഒരു തവണയെങ്കിലും പങ്കെടുത്തിരിക്കണം, ബന്ധപ്പെട്ട മേഖലയിൽ പ്രവൃത്തിപരിചയം ഉളളവർക്ക് മുൻഗണന, ശമ്പളം: പ്രതിമാസം 30,000 രൂപ).

എഡ്യുക്കേറ്റർ (ഹിസ്റ്ററി, ഇക്കണോമിക്‌സ്, പൊളിറ്റിക്കൽ സയൻസ്, മലയാളം, ലിറ്ററേച്ചർ, പബ്ലിക് അഡ്മിനിസ്‌ട്രേഷൻ, സോഷിയോളജി, ജോഗ്രഫി, എൻവയറോൺമെന്റ് സയൻസ് എന്നീ വിഷയങ്ങളിൽ), ഒഴിവ് (ആറ് എണ്ണം വീതം), യോഗ്യത – യു.പി.എസ്.സി സിവിൽ സർവീസ് ഇന്റർവ്യൂവിൽ ഒരു തവണയെങ്കിലും പങ്കെടുത്തിരിക്കണം.

മേൽവിഷയത്തിൽ ഏതെങ്കിലും ഒന്ന് ഐച്ഛിക വിഷയമായി എടുത്ത് പങ്കെടുത്തിട്ടുളളയാളായിരിക്കണം, ശമ്പളം: പ്രതിമാസം 35,000 രൂപ). നിയമനങ്ങൾക്കുളള  വാക്ക്-ഇൻ-ഇന്റർവ്യൂ കേരള സ്റ്റേറ്റ് സിവിൽ സർവീസ് സർവീസ് അക്കാഡമിയുടെ തിരുവനന്തപുരത്ത് ചാരാച്ചിറയിലുളള ഓഫീസിൽ നടക്കും. കൂടുതൽ വിവരങ്ങൾക്ക് സി.സി.ഇ.കെ യുടെ ഔദ്യോഗിക വെബ്‌സൈറ്റിലെ www.ccek.org സന്ദർശിക്കുക.

ട്രഷറി വകുപ്പില്‍ ഡേറ്റാബേസ് അഡ്മിനിസ്‌ട്രേറ്ററെ നിയമിക്കുന്നു

ട്രഷറി വകുപ്പിൽ കരാർ വ്യവസ്ഥയിൽ ഡേറ്റാബേസ് അഡ്മിനിസ്‌ട്രേറ്ററെ നിയമിക്കുന്നു. കമ്പ്യൂട്ടർ സയൻസിൽ ബി.ടെക്, എം.ടെക് യോഗ്യതയോ എം.സി.എയോ ഐ.ടിയിൽ എം.എസ്‌സിയോ ഉളളവർ ജൂലൈ അഞ്ചിനകം അപേക്ഷിക്കണം. 40 വയസിൽ താഴെയുളളവർക്ക് അപേക്ഷ നൽകാം. 85,000 രൂപയാണ് വേതനം. മൂന്നോ അതിലധികമോ വർഷത്തെ പ്രവൃത്തിപരിചയം വേണം.

ബയോഡേറ്റയും അപേക്ഷയും ജനനത്തീയതി, വിദ്യാഭ്യാസം, യോഗ്യത, പ്രവൃത്തിപരിചയം എന്നിവ തെളിയിക്കുന്ന രേഖകളുടെ പകർപ്പ് സഹിതം ഡയറക്ടർ ഓഫ് ട്രഷറീസ്, കൃഷ്ണ ബിൽഡിംഗ്, തൈക്കാട് പി.ഒ. 695014, തിരുവനന്തപുരം എന്ന വിലാസത്തിൽ അയയ്ക്കണം.  career.treasury@kerala.gov.in എന്ന മെയിലിലേക്കും അയയ്ക്കാം.

കൊറോണ പ്രതിരോധത്തിന് ഫാര്‍മസിസ്റ്റുകളെ നിയമിക്കുന്നു

കേരള പബ്ലിക് സർവീസ് കമ്മീഷൻ്റെ ഫാർമസിസ്റ്റ് റാങ്ക് ലിസ്റ്റിൽ ഒന്നു മുതൽ നൂറ് വരെയുള്ളവരിൽ കൊറോണ പ്രതിരോധത്തിൻ്റെ ഭാഗമായി മൂന്നു മാസത്തേക്ക് ദിവസ വേതനാടിസ്ഥാനത്തിൽ എന്‍. എച്ച് .എമ്മിനു കീഴിൽ സേവനമനുഷ്ഠിക്കാന്‍ സന്നദ്ധതയുള്ളവര്‍ക്ക് അപേക്ഷ നല്‍കാം. ഏപ്രില്‍ 24ന് മുന്‍പ് hrnhmkottayam@gmail.com എന്ന  ഇ- മെയിലിൽ വിലാസത്തിലാണ് അപേക്ഷിക്കേണ്ടത്. ഫോണ്‍- 0481-2304844. 

മാസ്റ്റര്‍ ട്രെയിനര്‍മാരെ തെരഞ്ഞെടുക്കുന്നു

കേരളാ ഇൻഫ്രാസ്ട്രക്ചർ ആൻഡ് ടെക്‌നോളജി ഫോർ എഡ്യൂക്കേഷനിൽ (കൈറ്റ്) മാസ്റ്റർ ട്രെയിനർമാരെ തിരഞ്ഞെടുക്കുന്നു. ഹയർ സെക്കൻഡറി-വൊക്കേഷണൽ ഹയർസെക്കൻഡറി/ ഹൈസ്‌കൂൾ/ പ്രൈമറി സ്‌കൂൾ അധ്യാപകർക്ക് അപേക്ഷിക്കാം. എയിഡഡ് മേഖലയിൽ നിന്നുള്ള അപേക്ഷകർ സ്‌കൂൾ മാനേജരിൽ നിന്നുള്ള നിരാക്ഷേപ സാക്ഷ്യപത്രം അഭിമുഖ സമയത്ത് സമർപ്പിക്കണം.

ഹൈസ്‌ക്കൂൾതലം വരെയുള്ള അപേക്ഷകർക്ക് ഫിസിക്‌സ്, കെമിസ്ട്രി, ബയോളജി, ഗണിതം, സോഷ്യൽ സയൻസ്, ഭാഷാ വിഷയങ്ങൾ എന്നിവയിൽ ഏതെങ്കിലും ഒന്നിൽ ബിരുദവും ബി.എഡും കമ്പ്യൂട്ടർ പ്രാവീണ്യവും ഉണ്ടായിരിക്കണം. പ്രവർത്തന പരിചയമുള്ള കമ്പ്യൂട്ടർ നിപുണരായ അധ്യാപകർക്കും സ്‌കൂൾ ഐ.ടി/ഹയർ സെക്കന്ററി സ്‌കൂൾ ഐ.ടി./പി.എസ്.ഐ.ടി. കോ-ഓർഡിനേറ്റർ/കൈറ്റ് മാസ്റ്റർ/കൈറ്റ് മിസ്ട്രസ്മാർക്ക് മുൻഗണന ലഭിക്കും.

ഒന്നുമുതൽ പന്ത്രണ്ടുവരെ ക്ലാസുകളിലേയ്ക്കുള്ള ഡിജിറ്റൽ വിഭവ നിർമാണം, അധ്യാപക പരിശീലനം, വിദ്യാഭ്യാസ വകുപ്പിലെ ഇ-ഗവേണൻസ് പ്രവർത്തനങ്ങൾ തുടങ്ങി കൈറ്റ് നിർദ്ദേശിക്കുന്ന മറ്റു ജോലികളും ചെയ്യാൻ സന്നദ്ധരായവരാണ് അപേക്ഷിക്കേണ്ടത്. ഇപ്പോൾ ജോലി ചെയ്യുന്ന റവന്യൂ ജില്ലയിൽ തന്നെ മാസ്റ്റർ ട്രെയിനർമാരായി പ്രവർത്തിക്കാൻ താത്പര്യമുള്ളവർക്ക് അപേക്ഷിക്കാം.

www.kite.kerala.gov.in  ൽ ഓൺലൈനായി 25ന് മുൻപ് അപേക്ഷ സമർപ്പിക്കണം. തിരഞ്ഞെടുക്കപ്പെടുന്നവരെ കൈറ്റിന്റെ നിലവിലെ മാനദണ്ഡങ്ങൾക്ക് വിധേയമായി വർക്കിംഗ് അറേഞ്ച്‌മെന്റ് വ്യവസ്ഥയിൽ നിയോഗിക്കും.

ദേവസ്വം ബോര്‍ഡ്: വിവിധ തസ്തികകളില്‍ അപേക്ഷ ക്ഷണിച്ചു

തിരുവിതാംകൂർ, കൊച്ചിൻ, മലബാർ, ഗുരുവായൂർ ദേവസ്വങ്ങളിലെ വിവിധ തസ്തികകളിലേക്ക് കേരള ദേവസ്വം റിക്രൂട്ട്‌മെന്റ് ബോർഡ് വിജ്ഞാപനം പുറപ്പെടുവിച്ചു.

ഗുരുവായൂർ ദേവസ്വത്തിലെ എൽ.ഡി. ക്ലർക്ക് ഉൾപ്പെടെ പത്ത് തസ്തികകളിലേക്ക് നേരിട്ടുള്ള നിയമനത്തിനും തിരുവിതാംകൂർ ദേവസ്വം ബോർഡിലെ പാർട്ട് ടൈം ശാന്തി (പട്ടികജാതി, പട്ടികവർഗം, ഒ.ബി.സി ഉദ്യോഗാർഥികൾക്ക് മാത്രം) രണ്ടാം ആനശേവുകം (ഒ.ബി.സി ഉദ്യോഗാർഥികൾക്ക് മാത്രം) തസ്തികകളിലേക്ക് എൻ.സി.എ നിയമനത്തിനും കൊച്ചിൻ ദേവസ്വം ബോർഡിലെ സിസ്റ്റം മാനേജർ തസ്തികയിലേക്ക് നേരിട്ടുള്ള നിയമനത്തിനും മലബാർ ദേവസ്വം ബോർഡിലെ എക്‌സിക്യൂട്ടീവ് ഓഫീസർ ഗ്രേഡ് 4 തസ്തികയിലേക്ക് മലബാർ ദേവസ്വം ബോർഡിന്റെ കീഴിലുള്ള ക്ഷേത്രജീവനക്കാർക്ക് തസ്തികമാറ്റം വഴിയുള്ള നിയമനത്തിനുമാണ് അപേക്ഷ ക്ഷണിച്ചത്.

അപേക്ഷിക്കുന്നതിനുള്ള അവസാന തിയതി ഏപ്രിൽ 18. യോഗ്യത, അപേക്ഷാഫീസ്, പ്രായപരിധി, ഒഴിവുകൾ തുടങ്ങിയ മുഴുവൻ വിവരങ്ങളും www.kdrb.kerala.gov.in  ൽ ലഭിക്കും.

പ്രോജക്ട് കോ-ഓര്‍ഡിനേറ്റര്‍ കരാര്‍ നിയമനം

ജനകീയ മത്സ്യകൃഷി പദ്ധതിയുടെ ഭാഗമായി ശാസ്ത്രീയവും നൂതനവുമായ രീതികളെക്കുറിച്ച് കർഷകർക്ക് അറിവ് പകരാനും, മത്സ്യകൃഷി സ്ഥലങ്ങൾ സന്ദർശിച്ചു സാങ്കേതികമായ സഹായങ്ങൾ നൽകാനും പ്രോജക്ട് കോ-ഓർഡിനേറ്റർമാരെ താത്ക്കാലികമായി നിയമിക്കുന്നു. സംസ്ഥാനത്താകെ 50 ഒഴിവുകളാണുള്ളത്. കരാർ അടിസ്ഥാനത്തിൽ ഒരു വർഷത്തേയ്ക്കാണ് നിയമനം. പ്രതിമാസം യാത്രാചെലവുകൾ ഉൾപ്പെടെ 24,040 രൂപയാണ് വേതനം.

സംസ്ഥാന കാർഷിക/ഫിഷറീസ് സർവ്വകലാശാലകളിൽ നിന്നുള്ള ബി.എഫ്.എസ്.സി ബിരുദം/ഏതെങ്കിലും അംഗീകൃത സർവ്വകലാശാലകളിൽ നിന്നുള്ള അക്വാകൾച്ചർ ബിരുദാനന്തര ബിരുദം/ഏതെങ്കിലും അംഗീകൃത സർവ്വകലാശാലയിൽ നിന്നും ഫിഷറീസ് വിഷയങ്ങളിലോ സുവോളജിയിലോ ബിരുദാനന്തര ബിരുദവും ഏതെങ്കിലും സർക്കാർ വകുപ്പിലോ സ്ഥാപനത്തിലോ അക്വാകൾച്ചർ മേഖലയിൽ കുറഞ്ഞത് മൂന്ന് വർഷത്തെ പ്രവൃത്തി പരിചയവുമുള്ളവർക്ക് അപേക്ഷിക്കാം.

പ്രായപരിധി 50 വയസ്. അപേക്ഷകരിൽ അടിസ്ഥാന യോഗ്യത നേടിയവരെ മാത്രം ഇന്റർവ്യൂ നടത്തി തിരഞ്ഞെടുപ്പ് പൂർത്തിയാക്കും. ബയോഡാറ്റയും അനുബന്ധ സർട്ടിഫിക്കറ്റുകളുടെ പകർപ്പും സഹിതം അപേക്ഷ സ്‌പെഷ്യൽ ഓഫീസർ, ജനകീയ മത്സ്യകൃഷി പദ്ധതി, ഫിഷറീസ് വകുപ്പ്, വികാസ് ഭവൻ പി.ഒ., വികാസ് ഭവൻ ബിൽഡിംഗ്, ഗ്രൗണ്ട്ഫ്‌ളോർ, തിരുവനന്തപുരം-695 033 എന്ന വിലാസത്തിൽ മാർച്ച് 31ന് മുൻപ് അയയ്ക്കണം.

ഇ-ഹെല്‍ത്ത് പദ്ധതിയില്‍ താല്കാലിക നിയമനം

കൊല്ലം, പത്തനംതിട്ട, കോട്ടയം എന്നീ ജില്ലകളിലെ വിവിധ സർക്കാർ ആശുപത്രികളിൽ ഇ-ഹെൽത്ത് പദ്ധതി നടപ്പിലാക്കുന്നതിന്റെ ഭാഗമായി ഹാൻഡ് ഹോൾഡിംഗ് സപ്പോർട്ടിംഗ് സ്റ്റാഫ് തസ്തികയിൽ താത്കാലിക നിയമനം നടത്തുന്നു. ഇതിലേക്ക് feb 26ന് അടൂർ ജനറൽ ആശുപത്രിയിൽ രാവിലെ പത്ത് മുതൽ വാക്ക് ഇൻ ഇന്റർവ്യൂ നടക്കും.

യോഗ്യത: ഡിപ്ലോമ/ ബി.എസ്സ്‌സി/ എം.എസ്സ്‌സി/ ബി.ടെക്/ എം.സി.എ (ഇലക്‌ട്രോണിക്‌സ്/ കമ്പ്യൂട്ടർ സയൻസ്/ ഐടി). ഹാർഡ്‌വെയർ & നെറ്റ് വർക്കിങ്ങിൽ ഒരു വർഷത്തെ പ്രവൃത്തിപരിചയം വേണം.  ഹോസ്പിറ്റൽ മാനേജ്‌മെന്റ് സോഫ്റ്റ്‌വെയർ & ഇംപ്ലിമെന്റേഷനിൽ പ്രവൃത്തിപരിചയം അഭികാമ്യം. വിശദവിവരങ്ങൾക്ക്        e-health.kerala.gov.in  സന്ദർശിക്കുക. ഫോൺ: 9495998964.

ജലനിധിയില്‍ സോഷ്യല്‍ ഡെവലപ്‌മെന്റ് കണ്‍സള്‍ട്ടന്റ്

മലപ്പുറം, പാലക്കാട് ജില്ലകളിൽ ജലനിധി ഒന്നാംഘട്ടത്തിൽ നടപ്പാക്കിയ കുടിവെള്ള പദ്ധതികളിൽ ഭാഗികമായോ പൂർണമായോ പ്രവർത്തനം നിലച്ച പദ്ധതികളുടെ പുനരുദ്ധാരണത്തിന് ഗുണഭോക്തൃ സമിതികളെ ശാക്തീകരിക്കുന്നതിനായി സോഷ്യൽ ഡെവലപ്‌മെന്റ് കൺസൾട്ടന്റ്മാരെ തെരഞ്ഞെടുക്കുന്നു.

എം.എസ്.ഡബ്ല്യു/എം.എ സോഷ്യോളജി അല്ലെങ്കിൽ സോഷ്യൽ സയൻസിലുള്ള ബിരുദാനന്തര ബിരുദവും ജലനിധി പദ്ധതിയിൽ ടീം ലീഡർ/ കമ്മ്യൂണിറ്റി ഡവലപ്‌മെന്റ് സ്‌പെഷ്യലിസ്റ്റ്/ കമ്മ്യൂണിറ്റി ഫെസിലിറ്റേറ്റർ തസ്തികയിലുള്ള മൂന്ന് വർഷത്തെ പ്രവൃത്തിപരിചയവുമാണ് യോഗ്യത. അല്ലെങ്കിൽ ബി.എസ്.ഡബ്ല്യു/ ബി.എ സോഷ്യോളജിയിലോ സോഷ്യൽ സയൻസിലോ ഉള്ള ബിരുദവും ജലനിധി പദ്ധതിയിൽ മൂന്ന് വർഷത്തെ പ്രവൃത്തിപരിചയം ഉൾപ്പെടെ സാമൂഹിക വികസന പദ്ധതികളിൽ അഞ്ച് വർഷം പ്രവൃത്തിപരിചയം ഉള്ളവർക്കും ഇന്റർവ്യൂവിൽ പങ്കെടുക്കാം.

ഉദ്യോഗാർത്ഥികൾ മലപ്പുറം കുന്നുമ്മൽ യു.എം.കെ ടവറിൽ പ്രവർത്തിക്കുന്ന കെ.ആർ.ഡബ്ല്യു.എസ്.എ യുടെ റീജിയണൽ പ്രോജക്റ്റ് മാനേജ്‌മെന്റ് യൂണിറ്റിൽ രേഖകൾ സഹിതം 28ന് രാവിലെ 10.30ന് അഭിമുഖത്തിന് ഹാജരാകണം. കൂടുതൽ വിവരങ്ങൾക്ക് www.jalanidhi.kerala.gov.in, ഫോൺ:0483-2738566.

ഇന്റേൺ താല്ക്കാലിക നിയമനം

റൂസ സംസ്ഥാന പദ്ധതി കാര്യാലയത്തിൽ സ്റ്റേറ്റ് ലെവൽ ക്വാളിറ്റി അഷ്വറൻസ് സെൽ (എസ്.എൽ.ക്യൂ.എ.സി) ഏക്. ഭാരത് ആന്റ് ശ്രേഷ്ഠ ഭാരത് (ഇ.ബി.എസ്.ബി) പ്രോജക്ടിൽ ഒരു വർഷത്തേക്ക് താൽകാലിക അടിസ്ഥാനത്തിൽ ഇന്റേണിനെ ക്ഷണിക്കുന്നു. യോഗ്യത പി.ജി/ബി.ടെക്/എം.ബി.എ, ഇംഗ്ലീഷ് ഭാഷയിലുളള പ്രാവീണ്യം. വേതനം 16,000 രൂപ. അപേക്ഷ റൂസ സംസ്ഥാന പദ്ധതി കാര്യാലയത്തിൽ മാർച്ച് അഞ്ചിനകം ലഭ്യമാക്കണം.

യു.എ.ഇ യില്‍ നഴ്‌സുമാര്‍ക്ക് അവസരം

യു.എ.ഇ യിലെ പ്രശസ്തമായ എമിറേറ്റ്‌സ് സ്‌പെഷ്യാലിറ്റി ആശുപത്രിയിലേയ്ക്ക് നോർക്ക റൂട്ട്‌സ് മുഖേന ബി.എസ്.സി. നഴ്‌സുമാരെ തിരഞ്ഞെടുക്കും. എൻ.ഐ.സി.യു/ നഴ്‌സറി വിഭാഗത്തിൽ കുറഞ്ഞത് മൂന്ന് വർഷം പ്രവൃത്തി പരിചയവും 30 വയസ്സിൽ താഴെ പ്രായവുമുള്ള വനിത നഴ്‌സുമാർക്ക് അപേക്ഷിക്കാം.തിരഞ്ഞെടുക്കപ്പെടുന്നവർക്ക് വിസ, വിമാനടിക്കറ്റ്, താമസം എന്നിവ സൗജന്യം. ശമ്പളം 4000-4500 ദിർഹം വരെ (ഏകദേശം 77,500 രൂപ മുതൽ 87,000 രൂപ വരെ) ലഭിക്കും. താത്പര്യമുള്ളവർ norkauae19@gmail.com    ൽ ഫെബ്രുവരി അഞ്ചിനകം ബയോഡാറ്റ സമർപ്പിക്കണം.വിശദവിവരങ്ങൾ www.norkaroots.org ൽ ലഭിക്കും. ടോൾ ഫ്രീ നമ്പർ: 18004253939 (ഇന്ത്യയിൽ നിന്നും),  00918802012345 (വിദേശത്തു നിന്നും മിസ്ഡ് കോൾ സേവനം).

കുടുംബശ്രീയില്‍ ഡെപ്യൂട്ടേഷന്‍ നിയമനം

സംസ്ഥാന ദാരിദ്ര്യ നിർമ്മാർജ്ജന മിഷൻ(കുടുംബശ്രീ) സംസ്ഥാന മിഷൻ ഓഫീസിൽ പ്രോഗ്രാം ഓഫീസർ/ചീഫ് ഓപ്പറേറ്റിംഗ് ഓഫീസർ തസ്തികകളിൽ ഡെപ്യൂട്ടേഷൻ നിയമനം നടത്തുന്നു. യോഗ്യരായ സംസ്ഥാന സർക്കാർ/അർദ്ധസർക്കാർ ജീവനക്കാർ കെഎസ്ആർ ചട്ടങ്ങൾ പ്രകാരം എൻ.ഒ.സി സഹിതം അപേക്ഷിക്കണം. ശമ്പള സ്‌കെയിൽ: 42500-87000.അംഗീകൃത യൂണിവേഴ്‌സിറ്റിയിൽ നിന്നുള്ള ബിരുദാനന്തര ബിരുദമാണ് യോഗ്യത. അപേക്ഷകർക്ക് കമ്പ്യൂട്ടറിൽ പ്രായോഗിക പരിജ്ഞാനം, ഇംഗ്ലീഷ് അവതരണം, മികച്ച ഡ്രാഫ്റ്റിംഗ് സ്‌കിൽ എന്നിവ അഭികാമ്യം. അപേക്ഷ ലഭിക്കേണ്ട അവസാന തീയതി ഫെബ്രുവരി 28.  എഴുത്തുപരീക്ഷയും ഇന്റർവ്യൂവും മാർച്ച് രണ്ടിന് രാവിലെ പത്ത് മുതൽ സംസ്ഥാന ദാരിദ്ര്യനിർമ്മാർജ്ജന മിഷൻ ഓഫീസിൽ നടക്കും. അപേക്ഷ അയയ്‌ക്കേണ്ട വിലാസം: എക്‌സിക്യൂട്ടീവ് ഡയറക്ടർ, കുടുംബശ്രീ, ട്രിഡ ബിൽഡിംഗ്, ചാലക്കുഴി ലെയിൻ, മെഡിക്കൽ കോളേജ്, തിരുവനന്തപുരം-695 011.

പട്ടികജാതി/ പട്ടികവര്‍ഗ ഉദ്യോഗാരത്ഥികള്‍ക്ക് തൊഴിലവസരം

ദേശീയ തൊഴിൽ സേവന കേന്ദ്രവും സംസ്ഥാന സർക്കാരിന്റെ മോഡൽ കരിയർ സർവീസ് സെന്ററും ടാറ്റാ കൺസൾട്ടൻസി സർവീസും സംയുക്തമായി പട്ടികജാതി പട്ടികവർഗ ഉദ്യോഗാർത്ഥിക്കായി സൗജന്യ പരിശീലനവും റിക്രൂട്ട്‌മെന്റും നടത്തുന്നു. ബി.എസ്‌സി (കമ്പ്യൂട്ടർ സയൻസ് ഒഴികെ)/ ബി.എ/ ബി.കോം ബിരുദമുളളവർക്കും അവസാനവർഷ ബിരുദ വിദ്യാർഥികൾക്കും അപേക്ഷിക്കാം.  കൂടുതൽ വിവരങ്ങൾക്ക് ഫെബ്രുവരി 20ന് മുമ്പ് 0471-2332113/ 8304009409 ൽ ബന്ധപ്പെടണം.

ഗുരുവായൂര്‍ ദേവസ്വം: വിവിധ തസ്തികകളിലേക്ക് അപേക്ഷ ക്ഷണിച്ചു

ഗുരുവായൂർ ദേവസ്വത്തിലെ 14 തസ്തികകളിലേക്ക് നേരിട്ടുള്ള നിയമനത്തിന് കേരള ദേവസ്വം റിക്രൂട്ട്‌മെന്റ് ബോർഡ് അപേക്ഷ ക്ഷണിച്ചു. ഗുരുവായൂർ ദേവസ്വം മെഡിക്കൽ സെന്ററിലേക്കുള്ള മെഡിക്കൽ സൂപ്രണ്ട്, സർജൻ, പീഡിയാട്രീഷ്യൻ, ഇ.എൻ.റ്റി സ്‌പെഷ്യലിസ്റ്റ്, റസിഡന്റ് മെഡിക്കർ ഓഫീസർ എന്നീ തസ്തികകളിലേക്കും സ്റ്റാഫ് നഴ്‌സ് ഗ്രേഡ് 2, ജൂനിയർ ഹെൽത്ത് ഇൻസ്‌പെക്ടർ ഗ്രേഡ് 2, ഫാർമസിസ്റ്റ് ഗ്രേഡ് 2, വെറ്ററിനറി സർജൻ, പബ്ലിക് റിലേഷൻസ് ഓഫീസർ, സിസ്റ്റം അഡ്മിനിസ്‌ട്രേറ്റർ (ഇലക്‌ട്രോണിക് ഡാറ്റാ പ്രോസസിങ്), റിലീജിയസ് പ്രൊപ്പഗാൻഡിസ്റ്റ്, കെ.ജി ടീച്ചർ (ഗുരുവായൂർ ദേവസ്വം ഇംഗ്ലീഷ് മീഡിയം സ്‌കൂൾ), ഡ്രൈവർ ഗ്രേഡ് 2 എന്നീ തസ്തികകളിലേക്കാണ് വിജ്ഞാപനം പുറപ്പെടുവിച്ചത്. ഫെബ്രുവരി 29 വരെ അപേക്ഷിക്കാം. യോഗ്യത, അപേക്ഷാഫീസ്, പ്രായപരിധി, ഒഴിവുകൾ തുടങ്ങിയ വിവരങ്ങൾ www.kdrb.kerala.gov.in ൽ ലഭ്യമാണ്.

സാമൂഹ്യനീതി വകുപ്പിൽ ഡെപ്യൂട്ടി ഡയറക്ടർ (മീഡിയ) തസ്തികയിൽ ഡെപ്യൂട്ടേഷൻ നിയമനം

സാമൂഹ്യനീതി ശാക്തീകരണ മന്ത്രാലയത്തിനു കീഴിൽ ഡൽഹി സാമൂഹ്യനീതി വകുപ്പിൽ ഡെപ്യൂട്ടി ഡയറക്ടർ (മീഡിയ) തസ്തികയിൽ ഡെപ്യൂട്ടേഷൻ നിയമനം നടത്തുന്നു. ശമ്പള സ്‌കെയിൽ 67700 – 208700 രൂപ. കേന്ദ്ര സംസ്ഥാന സർക്കാർ ഉദ്യോഗസ്ഥർ, സർവകലാശാലകൾ, അംഗീകൃത ഗവേഷണ സ്ഥാപനങ്ങൾ, അർദ്ധസർക്കാർ സ്വയംഭരണ സ്ഥാപനങ്ങൾ എന്നിവിടങ്ങളിൽ സമാനതസ്തികയിൽ ജോലി ചെയ്യുന്നവർക്ക് അപേക്ഷിക്കാം.ലെവൽ 10ൽ അഞ്ച് വർഷം സർവീസുള്ളവർക്കും അപേക്ഷ സമർപ്പിക്കാം. ജേർണലിസത്തിലോ മാസ് കമ്മ്യൂണിക്കേഷനിലോ ഉള്ള ബിരുദാനന്തര ബിരുദമോ ഡിപ്ലോമയോ യോഗ്യതയും അച്ചടി ദൃശ്യമാധ്യമങ്ങളിൽ എഡിറ്റിങ്ങിൽ മൂന്ന് വർഷം പ്രവൃത്തിപരിചയവും വേണം. ഇന്ത്യൻ ഇൻഫർമേഷൻ സർവീസിൽ അഞ്ച് വർഷത്തെ സേവനമുള്ളവർക്കും അപേക്ഷിക്കാം. കരാറടിസ്ഥാനത്തിലായിരിക്കും നിയമനം. അപേക്ഷകർക്ക് 56 വയസ്സ് കഴിയരുത്. എംപ്ലോയ്‌മെന്റ് ന്യൂസിൽ വാർത്തവന്ന് 45 ദിവസത്തിനുള്ളിൽ അപേക്ഷ ലഭ്യമാക്കണം. വിലാസം:  Director (Admn.), D/o SJ&E, Room No. 637, ‘A’ wing, Shastri Bhawan, New Delhi – 110001.

ടെക്‌നീഷ്യൻ-ബോയ്‌ലർ ഓപ്പറേറ്ററിന്റെ താത്ക്കാലിക ഒഴിവുകൾ

ഒരു അർദ്ധ സർക്കാർ സ്ഥാപനത്തിൽ ടെക്‌നീഷ്യൻ-ബോയ്‌ലർ ഓപ്പറേറ്ററിന്റെ ഓപ്പൺ വിഭാഗത്തിനും എസ്.സി വിഭാഗത്തിനും സംവരണം ചെയ്ത ഓരോ താത്ക്കാലിക ഒഴിവുകൾ ഉണ്ട്. പ്രതിദിനം 657 രൂപ വേതനം ലഭിക്കും. എസ്.എസ്.എൽ.സിയും സെക്കൻഡ് ക്ലാസ് ബോയ്‌ലർ സർട്ടിഫിക്കറ്റോടുകൂടിയ ഐ.ടി.ഐ ഫിറ്റർ ഗ്രേഡ് യോഗ്യതയുള്ളവർക്ക് അപേക്ഷിക്കാം. പ്രായം 2017 ജനുവരി ഒന്നിന് 18 വയസ്സിനും 41നും ഇടയിൽ (നിയമാനുസൃത വയസ്സിളവ് ബാധകം). സ്ത്രീകളും ഭിന്നശേഷിക്കാരും അപേക്ഷിക്കേണ്ടതില്ല. ഉദ്യോഗാർത്ഥികൾ എല്ലാ അസ്സൽ സർട്ടിഫിക്കറ്റുകളുമായി 15നകം അതത് എംപ്ലോയ്‌മെന്റ് എക്‌സ്‌ചേഞ്ചിൽ ഹാജരാകണം.

Learn more            Learn more            Learn more 

സി-ഡിറ്റ് വെബ് സർവ്വീസ് ഡിവിഷനിൽ നിയമനം നടത്തുന്നു.

സി-ഡിറ്റ് വെബ് സർവ്വീസ് ഡിവിഷനിൽ വെബ് ആപ്ലിക്കേഷൻ ഡെവലപ്പർ പോസ്റ്റിൽ നിയമനം നടത്തുന്നു. ബി.ടെക്, എം.സി.എ എന്നീ യോഗ്യതകളുള്ളവർക്ക് ഇന്റർവ്യൂവിൽ പങ്കെടുക്കാം. പി.എച്ച്.പി, ലാറവെൽ, പൈത്തോൺ, ഫ്‌ളാസ്‌ക് ടെക്‌നോളജി എന്നിവയിലെ അറിവ്, ഏതെങ്കിലും അംഗീകൃത സ്ഥാപനത്തിൽ നിന്നും വെബ് ആപ്ലിക്കേഷൻ ഡെവലപ്‌മെന്റിൽ നേടിയ സർട്ടിഫിക്കറ്റ് എന്നിവ അനിവാര്യം. ദ്രുപാലിലുള്ള അറിവ് അധികയോഗ്യതയായി കണക്കാക്കും. ഉദ്യോഗാർത്ഥികൾ ബയോഡേറ്റയും യോഗ്യത തെളിയിക്കുന്ന രേഖകളുമായി 16ന് വാൻറോസ് ജംഗ്ഷനിലുള്ള സി-ഡിറ്റ് ഗോർക്കി ഭവൻ ഓഫീസിൽ രാവിലെ 10ന് ഇന്റർവ്യൂവിന് ഹാജരാകണം.

ഫോട്ടോഗ്രാഫർ തസ്തികയിൽ താത്കാലിക നിയമനം

തൃശൂർ ജില്ലയിലെ ഒരു സർക്കാർ സ്ഥാപനത്തിൽ ഫോട്ടോഗ്രാഫർ തസ്തികയിൽ താത്കാലിക നിയമനം നടത്തുന്നു.
എസ്.എസ്.എൽ.സിയോ തത്തുല്യമോ യോഗ്യതയും ഫോട്ടോസ്റ്റുഡിയോയിലോ ന്യൂസ് ഫോട്ടോ ഏജൻസിയിലോ മുൻനിര ന്യൂസ് ജേർണലിലോ അഞ്ച് വർഷത്തെ പ്രവൃത്തിപരിചയവും വേണം. പ്രവൃത്തിപരിചയത്തിൽ അഞ്ച് വർഷത്തിൽ കുറവുള്ളവരെയും പരിഗണിക്കും. പ്രായപരിധി 18നു 41നും മദ്ധ്യേ. നിശ്ചിത യോഗ്യതയുള്ള ഉദ്യോഗാർത്ഥികൾ ഫെബ്രുവരി ഒന്നിനകം അടുത്തുള്ള എംപ്ലോയ്‌മെന്റ് എക്‌സ്‌ചേഞ്ചുകളിൽ പേര് രജിസ്റ്റർ ചെയ്യണം.

സ്‌പെക്ട്രം ജോബ് ഫെയറിലേക്ക് രജിസ്റ്റര്‍  ചെയ്യാം

പരിശീലനം വിജയകരമായി പൂർത്തിയാക്കിയ ട്രെയിനികൾക്ക് ബന്ധപ്പെട്ട മേഖലയിൽ തൊഴിൽ നേടുന്നതിനായി വ്യാവസായിക വകുപ്പ് നടത്തി വരുന്ന സ്‌പെക്ട്രം ജോബ് ഫെയർ ജനുവരി പത്തിനും 11നും ചാക്ക ഗവ. ഐ.ടിയിൽ നടക്കും. തൊഴിൽ മേളയിൽ വിദേശത്തു നിന്നുമുള്ള കമ്പനികൾ ഉൾപ്പെടെ പങ്കെടുക്കും. തൊഴിൽമേളയിൽ പങ്കെടുക്കാൻ താത്പര്യമുള്ള അർഹതയുള്ള ട്രെയിനികൾ www.spectrumjobfair.org ൽ രജിസ്റ്റർ ചെയ്യണം. ഇതുമായി ബന്ധപ്പെട്ട ഹെൽപ്പ് ഡെസ്‌ക് എല്ലാ സർക്കാർ ഐ.ടി.ഐ കളിലും സ്വകാര്യ ഐ.ടി.ഐ കളിലും പ്രവർത്തിച്ചു വരുന്നു.

ഡാറ്റാ എന്‍ട്രി ഓപ്പറേറ്റര്‍ നിയമനം

മണ്ണാര്‍ക്കാട് താലൂക്കാശുപത്രിയില്‍ ആരംഭിക്കുന്ന കമ്പ്യൂട്ടര്‍വത്കൃത ഒ.പി കൗണ്ടറിലേക്ക് ഡാറ്റാ എന്‍ട്രി ഓപ്പറേറ്ററെ ദിവസ വേതനാടിസ്ഥാനത്തില്‍ നിയമിക്കുന്നു. പ്ലസ് ടുവിനൊപ്പം കമ്പ്യൂട്ടര്‍ പരിജ്ഞാനവും ഉണ്ടായിരിക്കണം. മണ്ണാര്‍ക്കാട് നഗരസഭാ പരിധിയിലുള്ളവര്‍ക്ക് മുന്‍ഗണന.താല്‍പര്യമുള്ളവര്‍ വയസ്സ്, വിദ്യാഭ്യാസ യോഗ്യത തെളിയിക്കുന്ന അസ്സല്‍ സര്‍ട്ടിഫിക്കറ്റുകളുമായി നവംബര്‍ 19 ന് രാവിലെ 10 ന് ആശുപത്രി ഓഫീസില്‍ കൂടിക്കാഴ്ച്ചയ്ക്ക് എത്തണമെന്ന് സൂപ്രണ്ട് അറിയിച്ചു. ഫോണ്‍: 04924-224549.

സ്ത്രീകളുടെയും കുട്ടികളുടെയും ഹോമില്‍ വിവിധ തസ്തികകളില്‍ നിയമനം

വനിത ശിശുവികസന വകുപ്പിന്റെ കീഴിൽ കേരള മഹിള സമഖ്യ സൊസൈറ്റിയുടെ ആഭിമുഖ്യത്തിൽ തിരുവനന്തപുരം ജില്ലയിൽ പ്രവർത്തിക്കുന്ന സ്ത്രീകളുടെയും കുട്ടികളുടെയും ഹോമിൽ സോഷ്യൽ വർക്കർ, സൈക്കോളജിസ്റ്റ്(പാർട്ട് ടൈം), ഫീൽഡ് വർക്കർ, അസിസ്റ്റന്റ് കെയർ ടേക്കർ  തസ്തികകളിൽ നിർദ്ദിഷ്ട യോഗ്യതയുള്ള സാമൂഹ്യ സേവനത്തിൽ താത്പര്യമുള്ള സ്ത്രീ ഉദ്യോഗാർത്ഥികളെ തെരഞ്ഞെടുക്കുന്നു. വാക്ക് ഇൻ ഇന്റർവ്യൂ 19ന് രാവിലെ 11ന് കേരള മഹിള സമഖ്യ സൊസൈറ്റിയുടെ കുഞ്ചാലുംമൂട്ടിലെ സംസ്ഥാന ഓഫീസിൽ നടക്കും. സോഷ്യൽ വർക്കർ കം കേസ് വർക്കർ, ഫീൽഡ് വർക്കർ തസ്തികകളിൽ എം.എസ്.ഡബ്ല്യു/എം.എ(സോഷ്യോളജി)/എം.എ(സൈക്കോളജി) യോഗ്യതയുള്ളവർക്ക് അപേക്ഷിക്കാം. സൈക്കോളജിസ്റ്റ്(പാർട്ട് ടൈം) തസ്തികയിൽ എം.എസ്‌സി/ എം.എ(സൈക്കോളജി) യും ഒരു വർഷത്തെ പ്രവൃത്തി പരിചയവും വേണം. ഫീൽഡ് വർക്കർ എം.എസ്.ഡബ്ല്യു/ എം.എ. പ്രായപരിധി 18നും 35 വയസ്സിനുമിടയിൽ. അസിസ്റ്റന്റ് കെയർടേക്കർ തസ്തികയിൽ പ്രീഡിഗ്രിയാണ് യോഗ്യത. പ്രായം 25നും 45നും മധ്യേ. നിർദ്ദിഷ്ട യോഗ്യതയുള്ള സാമൂഹ്യ സേവനത്തിൽ തത്പരരായ സ്ത്രീ ഉദ്യോഗാർത്ഥികൾ അപേക്ഷ, സർട്ടിഫിക്കറ്റുകളുടെ കോപ്പി എന്നിവയുമായി ഇന്റർവ്യൂവിനെത്തണം. പാർട്ട് ടൈം തസ്തികകൾ ഒഴികെ മറ്റെല്ലാം താമസിച്ച് ജോലി ചെയ്യേണ്ടവയാണ്.

വനഗവേഷണ സ്ഥാപനത്തിൽ രണ്ട് സ്റ്റെനോഗ്രാഫറുടെ ഒഴിവുകള്‍

കേരള വനഗവേഷണ സ്ഥാപനത്തിൽ 89 ദിവസത്തേക്ക് ദിവസവേതനാടിസ്ഥാനത്തിൽ രണ്ട് സ്റ്റെനോഗ്രാഫറുടെ ഒഴിവിലേക്ക് ഒക്‌ടോബർ 14ന് രാവിലെ 10ന് വനഗവേഷണ സ്ഥാപനത്തിന്റെ തൃശ്ശൂർ പീച്ചിയിലുള്ള ഓഫീസിൽ വാക്-ഇൻ-ഇന്റർവ്യൂ നടത്തും. വിശദവിവരങ്ങൾക്ക് കേരള വനഗവേഷണ സ്ഥാപനത്തിന്റെ വെബ്‌സൈറ്റ് (www.kfri.res.in) സന്ദർശിക്കക.

ജില്ലാ എക്‌സിക്യൂട്ടീവ് ഓഫീസറുടെ തസ്തികയിലേക്ക് അപേക്ഷ ക്ഷണിച്ചു.  

കേരള കർഷക തൊഴിലാളി ക്ഷേമനിധി ബോർഡിന്റെ കൊല്ലം, പത്തനംതിട്ട ഓഫീസുകളിൽ ജില്ലാ എക്‌സിക്യൂട്ടീവ് ഓഫീസറുടെ തസ്തികയിലേക്ക് ഡെപ്യൂട്ടേഷൻ വ്യവസ്ഥയിൽ അപേക്ഷ ക്ഷണിച്ചു.  സർക്കാർ, അർധസർക്കാർ സ്ഥാപനങ്ങളിൽ ജോലി ചെയ്യുന്ന 36,600 – 79,200 ശമ്പളസ്‌കെയിലുള്ള ജീവനക്കാർക്ക് അപേക്ഷിക്കാം.

സൂപ്പർവൈസറി തസ്തികയിൽ ജോലിചെയ്യുന്ന ജീവനക്കാരുടെ അപേക്ഷകളും ശമ്പള സ്‌കെയിൽ കുറവാണെങ്കിലും പരിഗണിക്കും.  ചട്ടപ്രകാരമുള്ള അപേക്ഷകൾ ചീഫ് എക്‌സിക്യൂട്ടീവ്, കേരള കർഷക തൊഴിലാളി ക്ഷേമനിധി ബോർഡ്, എസ്.എൻ പാർക്ക്, പൂത്തോൾ പി.ഒ, പിൻ – 680004 എന്ന വിലാസത്തിൽ ഒക്‌ടോബർ 19 നകം ലഭിക്കണം.  ഫോൺ: 0487-2386871.

Please Visit www.nynabooks.com

അർധസർക്കാർ സ്ഥാപനത്തിൽ ഡെപ്യൂട്ടി മാനേജർ (പ്രോജക്ട്‌സ്), അസി. മാനേജർ ഒഴിവുകള്‍

സംസ്ഥാനത്തെ ഒരു അർധസർക്കാർ സ്ഥാപനത്തിൽ ഡെപ്യൂട്ടി മാനേജർ (പ്രോജക്ട്‌സ്), അസി. മാനേജർ (പി ആൻഡ് എ) എന്നീ തസ്തികകളിൽ ഓരോ സ്ഥിരം ഒഴിവുണ്ട്. പ്രായപരിധി: 2019 ജനുവരി ഒന്നിന് 41 വയസ്സ് കവിയാൻ പാടില്ല (നിയമാനുസൃത വയസ്സിളവ് ബാധകം). ശമ്പളം: 20,040-38,840 (ഡെപ്യൂട്ടി മാനേജർ), 20,740-36,140 (അസി: മാനേജർ). ഡെപ്യൂട്ടി മാനേജരുടെ യോഗ്യത: മെക്കാനിക്കൽ/ ഇലക്ട്രിക്കൽ എൻജിനീയറിംഗിലുള്ള ബിരുദം, എം.ബി.എ യോഗ്യത അഭികാമ്യം, എതെങ്കിലും അംഗീകൃത ഫാർമസ്യൂട്ടിക്കൽ കമ്പനിയിൽ മാനേജർ തസ്തികയിൽ അഞ്ചു വർഷത്തിൽ കുറയാത്ത പ്രവൃത്തി പരിചയം. അസി. മാനേജരുടെ യോഗ്യത:  ഹ്യൂമൺ റിസോഴ്‌സസിലുള്ള എം.ബി.എ, ലേബർ ലോ ഇലക്ടീവ് വിഷയമായുള്ള എൽ.എൽ.ബി, ഏതെങ്കിലും അംഗികൃത സ്ഥാപനത്തിൽ നിന്ന് പേഴ്‌സണൽ മാനേജർ തസ്തികയിൽ അഞ്ചു വർഷത്തിൽ കുറയാത്ത പ്രവൃത്തി പരിചയം. നിശ്ചിതയോഗ്യതയും പ്രവൃത്തി പരിചയവുമുള്ള ഉദ്യോഗാർഥികൾ എല്ലാ അസ്സൽ സർട്ടിഫിക്കറ്റുകളുമായി ഒക്‌ടോബർ ഒമ്പതിന് മുമ്പ് തൊട്ടടുത്തുള്ള പ്രൊഫഷണൽ & എക്‌സിക്യൂട്ടീവ് എംപ്ലോയ്‌മെന്റ് എക്‌സ്‌ചേഞ്ചിൽ നേരിട്ട് ഹാജരായി പേര് രജിസ്റ്റർ ചെയ്യണം.