ഇഴുക്കം /കവിത /അമൃത പി

 

തിരുമ്പാനെടുത്ത കൈക്കല തുണിക്ക്

ഭയങ്കര ഇഴുക്കം...

കയ്യിൽ നിന്ന് വഴുക്കനെ

അത് വീണ്ടും ഊർന്നിറങ്ങി..

നാശം.. അറക്കുന്നു...

വല്ലാത്ത വഴുവഴുപ്പ്..

കാലങ്ങളായുള്ള...

അടുക്കളയുടെ മുഴുവൻ അഴുക്കുകളും

അതിന്റെ പ്രതലത്തിൽ

ഒട്ടിയൊട്ടി പിടിച്ചങ്ങനെ...

പൊട്ടിയൊലിച്ച സിങ്കും;

പരന്ന വീതനപ്പുറവും;

കഞ്ഞിവെള്ളം വീണ തറയും;

കറിയൊലിച്ച സ്റ്റവും....

ഒരിക്കലും ഒരിക്കലും..

അതിനെ പൂർണമായി ഉണങ്ങാനനുവദിച്ചില്ല...

മതി നിർത്താം..

ഇതിനെ പൂർണമായും വെളുപ്പിക്കേണ്ടതില്ല.. 

നാളത്തെ അടുക്കള സാമ്രാജ്യത്തിന്റെ

അനന്തരാവകാശിക്ക്..

കാലങ്ങളായുള്ള ഈ വിഴുപ്പ്

അതിന്റെ കടമ സമ്മാനിക്കട്ടെ...

അമൃത. പി 

(മലപ്പുറം, കോട്ടക്കൽ സ്വദേശി. മലയാള സാഹിത്യത്തില്‍ ബി. എ, എം. എ, ബി.എഡ് ബിരുദധാരിയാണ്.)