സ്ഥലം സബ് ഇന്‍സ്പെക്ടര്‍ സത്യസന്ധനും സര്‍വോപരി സദ്സ്വഭാവിയുമായിരുന്നു. സദ്സ്വഭാവികള്‍ക്ക് പോലീസില്‍ സ്ഥാനമുണ്ടോ എന്ന സംശയം അദ്ദേഹത്തിനേതും ഉണ്ടാകാതെയിരുന്നുമില്ല. അതുകൊണ്ടുതന്നെ ഒറ്റയിരിപ്പിലും വീര്‍പ്പിലുമായി വിവരം പ്രഥമനാക്കി. പ്രഥമന്‍ തയ്യാറായി വിളമ്പാനിരിക്കവേയാണ് പോലീസ് മേധാവിയുടെ ഫോണ്‍ വിളി
" ഹലോ, വേതാളമംഗലം പോലീസ് സ്റ്റേഷനല്ലേ?"
"അതെ, വേതാളമാണ് സംസാരിക്കുന്നത് സാര്‍.."
" മിസ്റ്റര്‍ വേതാളം, അവിടെ എന്‍റെ സുഹൃത്ത് വ്യാപാരി വ്യവഹാരി ഏതോ കാറപടകത്തില്‍ പെട്ടെന്ന് കേട്ടു."
"കാറപകടമല്ല സാര്‍. കൊലപാതകമാണ്. ഒരു പാവം സെക്യൂരിറ്റിക്കാരനെ കാറിടിപ്പിച്ച് കൊലപ്പെടുത്തിയിരിക്കുകയാണ്."
" സാദാ അപകടമാണോ, വാഹനാപകടമാണോ, കൊലപാതകമാണോ എന്നെല്ലാം തീരുമാനിക്കുന്നത് നമ്മളല്ലേ..?"
" എന്നാലും സാര്‍, തെളിവുകള്‍..?"
" ദൃക്സാക്ഷി തെളിവുകളില്ല്ലലോ."
" എന്നാലും സാഹചര്യത്തെളിവുകള്‍.?
"സാഹചര്യമൊക്കെ നമ്മളുണ്ടാക്കുന്നതല്ലേ."
"എന്നാലും സാര്‍ രക്തക്കറ?"
" അതൊക്കെ നമുക്കുതന്നെ കഴുകി കളയാവുന്നതല്ലേ."
" എന്നാലും സാര്‍ മരണം?"
" ഹൃദയസ്തംഭനത്തിന്‍റെ പേര് പറഞ്ഞാല്‍ പോരേ"
" ആരെങ്കിലും അറിഞ്ഞാല്‍?"
" അറിയുന്നവരെയെല്ലാം വ്യവഹാരി അറിഞ്ഞുകാണും"
"എന്നാലും സാര്‍ മനഃസാക്ഷി?"
" പിന്നെ തന്നോടൊരു കാര്യം പറഞ്ഞേക്കാം, മനഃസാക്ഷിയും വച്ച് പോലീസില്‍ പ്രവര്‍ത്തിക്കാന്‍ വരരുത്. സസ്പെന്‍ഷന്‍ വേണോ, സ്ഥലം മാറ്റം വേണോ?
" സാര്‍ ഞാന്‍ വിവാഹം കഴിക്കാന്‍ മുട്ടി നില്‍ക്കുകയാണ്. ജോലിയില്ലാത്തവന് ആരെങ്കിലും പെണ്ണുതരുമോ..?"
" അതാ തന്നോട് ഞാന്‍ മര്യാദക്ക് മര്യാദരാമനായി പറഞ്ഞത്. എഴുതിത്തള്ളിയേര്. പിന്നെ വെറുതെ വേണ്ട. താനും വ്യവഹാരിയും കൂടി കേസ് അന്വേഷണത്തിനെന്ന് പറഞ്ഞ് സിംഗപ്പൂരിലൊക്കെ പോയി ഒന്ന് കറങ്ങിയിട്ട് വന്നിട്ട് മതി തള്ളല്‍."
" സാര്‍ അപ്പോള്‍ ഇങ്ങനേയും കേസ് അന്വേഷിക്കാം അല്ലേ. ഞാന്‍ ധരിച്ത് ഈ ഷെര്‍ലക് ഹോംസും ജെയിംസ് ബോണ്ടുമൊക്കെ ചെയ്യുന്ന രീതിയില്‍..."
" അതെല്ലാം പഴഞ്ചന്‍ രീതികള്‍. കാലാനുസൃതമായി പോലീസും മാറണ്ടേ മിസ്റ്റര്‍ വേതാളം?"
" ഇതാണല്ലേ ന്യൂജെന്‍ പോലീസ് ?"
" യെസ്!"
അഡ്വ. എം. എം. മോനായി
(കുന്നത്തുനാട് മുന്‍ എം.എല്‍.എയും കാര്‍ട്ടൂണിസ്റ്റും നോവലിസ്റ്റുമാണ്. തമാശമാസികയുടെ പത്രാധിപസമിതിഅംഗമാണ്)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ